Restawr tal-istatwa ta’ San Ġużepp Gudja

Restawr tal-istatwa ta’ San Ġużepp Gudja

 

Bernard Mallia, iben Ġużeppi mill-Gudja, telaq minn Malta meta kien għadu żgħir ħafna u mar joqgħod fil-Portugall. Wara li qatta’ diversi snin hemmhekk u rnexxielu jakkwista ġid sostanzjali permezz tal-attivitajiet kummerċjali tiegħu, huwa irritorna Malta fl-1832 b’ġid konsiderevoli.

Bħala turija tal-imħabba tiegħu lejn raħal twelidu u tad-devozzjoni kbira li kellu lejn San Ġużepp, Bernard Mallia iddeċieda li jħalli tifkira permanenti lill-Gudja billi ordna l-istatwa tal-Patrijarka San Ġużepp. Fil-fatt, l-iskrizzjoni “Dalla pia devozione di Bernardo Mallia” darba kienet tidher taħt l-istatwa u kienet isservi bħala xhieda ċara tad-devozzjoni speċjali li kellu lejn dan il-qaddis.

L-istatwa, li swiet mitt skud, hija xogħol l-iskultur Mastru Xandru Farrugia (1791-1871) miż-Żejtun u tqiegħdet fil-post preżenti tagħha fis-6 ta’ Lulju 1834. Dun Ġwann Bonnici tal-Gudja, li dak iż-żmien kien qed iservi bħala viċi kappillan tal-parroċċa, bierek l-istatwa. Hu kien ġie maħtur mill-Isqof ta’ Malta, Monsinjur Francesco Saverio Caruana biex imexxi ċ-ċerimonja peress li l-kappillan tal-Gudja ta’ dak iż-żmien, Dun Salv Fenech minn Ħal Balzan, ma setax jattendi minħabba problemi serji fil-vista.1

Xogħlijiet ta’ restawr

Ix-xogħlijiet ta’ restawr bdew bit-tneħħija kawtela ta’ saffi differenti ta’ żebgħa li kienu akkumulaw matul is-snin kemm fuq l-istatwa kif ukoll fuq il-pedestall. Ir-residwi li kien fadal tneħħew permezz ta’ dry brushing u wet brushing. Il-fili miftuħa u deterjorati ġew imnaddfa u mtlew mill-ġdid, filwaqt li l-partijiet tal-ġebla li kienu sofrew deterjorazzjoni ġew imsewwija bl-użu tal-plastic repair sabiex reġgħet ingħatat il-profil oriġinali. Wara li tlestew l-interventi ta’ konservazzjoni, l-istatwa u l-pedestall ġew miżbugħa b’diversi saffi ta’ undercoat u finish sabiex jiġi żgurat saff protettiv uniformi u li jservi fit-tul. Il-kanċell ornamentali protettiv tal-ferro battuto li jdawwar l-istatwa u l-pedestall tagħha ġew miżbugħin mill-ġdid ukoll.

Referenza:

  1. Gatt, Ġ. (1928). Niċeċ u statwi. Il-Malti, 4.