Niċċa ta’ San Pawl fiż-Żurrieq

Restawr tan-Niċċa ta’ San Pawl – Iż-Żurrieq

Fiċ-ċentru storiku taż-Żurrieq, fejn jiltaqgħu Triq San Pawl u Triq San Bartilmew, tinsab niċċa modesta iżda sinifikattiva, iddedikata lil San Pawl. Din in-niċċa li ġiet irrestawrata riċentement  tifforma parti mit-tradizzjoni għanja Maltija ta’ xbihat reliġjużi li naraw imxerrda mat-toroq tal-pajjiż kollu.

Id-data eżatta ta’ meta nbniet in-niċċa mhijiex magħrufa. Għolja tmien filati, in-niċċa tinsab fil-kantuniera bejn żewġ toroq u fiha nsibu statwa ta’ San Pawl, ispirata minn dik famuża statwa li Melchiorre Gafà ħadem għall-knisja kolleġġjata ta’ San Pawl Nawfragu fil-Belt Valletta.¹ Din in-niċċa kienet tiġi imdawla fil-festa tal-qaddis.² Dawn in-niċeċ li naraw fit-toroq kienu ħafna drabi kkummissjonati bħala att ta’ devozzjoni minn individwi privati u aktar tard saru parti għażiża mill-identità kulturali u reliġjuża ta’ pajjiżna. Minħabba l-valur patrimonjali tagħha, is-Sovrintendenża tal-Patrimonju Kulturali elenkat in-niċċa ta’ San Pawl bħala proprjetà ta’ “valur soċjali, artistiku u arkitettoniku għoli” fl-inventarju nazzjonali tal-patrimonju kulturali ta’ Malta.³